Normandie Héritage

Quand Papa Noué veindra. 


Auteur : Frank Le Maistre

Mots clé :

Jèrriais

|

Jersey

|

Langue normande

|

Noël

|

Quand papa Noué veindra, Frank Le Maistre

Quand papa Noué veindra
J’veurs tch’i’ m’donne un tas s’tchi —
Tout pliein d’bouôn chocolat,
D’s oranges, toutes sortes d’fruit,
Des figues et des raisins,
Eune grand’ pap’sée d’chucrins.

Un livre dé p’tites histouaithes
Atout des bieaux portraits,
Des pommes et pis acouaithe
Des almandes et des nouaix,
Des châtaines, des codrettes,
Ma cauche plieine dé belles jouettes.

Eune boêtée d’rouoges soudards
Et pis des p’tits bliancs j’vaux ;
Tch’i’ pense à des pétards
Et à des dominnos,
Et pis j’mé graiethais d’charme
D’un tambour et d’eune arme –

Marbres, cannif et topie,
Des belles gammes, eune trompette —
Ma liste est-alle finnie ? —
Tout l’restant d’sa poutchette ;
V’la tout chein qu’j’veurs, ah ça,
Quand Papa Noué veindra !

Noël Jerriais
Lé Bulletîn d’Quart d’An de L’Assembliée d’Jèrriais
La St. Miché et Noué, 1971
Vol. 4 Nos 1 et 2

Chutte pièche, composée y’a bein d’s années, est pouor les êfants tchi pendent lus cauches.

Logo officiel Normandie Héritage © normandie-heritage.com
Gestion de contenu spip(3.0.17)
Copyright © normandie-heritage.com
Tous droits de diffusion et de reproduction réservés.